បន្ទាយមានជ័យ៖ ឯកឧត្តម វ៉ាត់ បុត្តកុសល អគ្គលេខាធិការរង គណៈកម្មាធិការជាតិទន្លេមេគង្គកម្ពុជា បានដឹកនាំកិច្ចប្រជុំផ្ទៃក្នុងនៃក្រុមការងារថ្នាក់ជាតិ សម្រាប់គម្រោងសហប្រតិបត្តិការឆ្លងដែនស្តីពី ការគ្រប់គ្រងទឹកជំនន់ និងគ្រោះរាំងស្ងួត ក្នុងតំបន់ព្រំដែនកម្ពុជា និងថៃ ដោយមានការអញ្ជើញចូលរួមពីសមាជិកក្រុមការងារថ្នាក់ជាតិ ព្រមទាំងទីប្រឹក្សា និងជំនាញការជាតិ និងការចុះសិក្សាស្វែងយល់ទីតាំងគម្រោងនៅអូរ ៣ជាន់ និងអូរ កៃដ ស្ថិតក្នុងខេត្តបន្ទាយមានជ័យ ក្នុងផ្ទៃរងទឹកភ្លៀងរួមគ្នា និងមានប្រភពទឹកហូរពីប្រទេសថៃ។
កិច្ចប្រជុំបានពិនិត្យពិភាក្សា និងផ្តល់មតិយោបល់ផ្នែកបច្ចេកទេស លើឯកសាររបាយការណ៍ស្តីពី គំនិតផ្តួចផ្តើមដំបូង និងវិធីសាស្ត្រការប្រមូល និងវិភាគទិន្នន័យពាក់ព័ន្ធ ស្ថានការណ៍ទឹកជំនន់ និងគ្រោះរាំងស្ងួតក្នុងតំបន់ និងបានសិក្សារៀនសូត្រស្វែងយល់ និងបានគាំទ្រអំពីសារសំខាន់នៃសំណើប្រភេទម៉ូដែលជលសាស្ត្រ ម៉ូដែលជលគតិ និងម៉ូដែលធនធានទឹក និងឧបករណ៍បច្ចេកទេសសម្រាប់ប្រើប្រាស់ដើម្បីវិភាគ និងវាយតម្លៃសេណារីយ៉ូ និងកំណត់អន្តរាគមន៍ជាជម្រើសសម្រាប់ការគ្រប់គ្រងទឹកជំនន់ និងគ្រោះរាំងស្ងួតក្នុងតំបន់ឆ្លងដែននៃប្រទេសកម្ពុជា-ថៃ៕