សៀមរាប៖ ឯកឧត្តម វ៉ាត់ បុត្តកុសល អគ្គលេខាធិការរង គណៈកម្មាធិការជាតិទន្លេមេគង្គកម្ពុជា បានដឹកនាំកិច្ចប្រជុំពិគ្រោះយោបល់ថ្នាក់ជាតិលើកទី១ ស្តីពីការដំណើរការពិគ្រោះយោបល់ជាមុន សម្រាប់គម្រោងវារីអគ្គិសនី ប៉ាក់ឡាយ របស់ឡាវ ដោយមានការចូលរួមពីមន្ត្រីជំនាញពាក់ព័ន្ធ នៃក្រសួងស្ថាប័នថ្នាក់ជាតិ រាជធានី-ខេត្ត តំណាងសង្គមស៊ីវិល គ្រឹះស្ថានសិក្សាស្រាវជ្រាវ និងតំណាងសហគមន៍។
កិច្ចប្រជុំនេះរៀបចំឡើងដើម្បីឱ្យអ្នកចូលរួមទាំងអស់បានយល់ដឹងអំពី កិច្ចព្រមព្រៀងមេគង្គឆ្នាំ១៩៩៥ និងនីតិវិធីទាំង៥ របស់គណៈកម្មការទន្លេមេគង្គ ជាពិសេសលើនីតិវិធី ស្តីពីការជូនដំណឹង ការពិគ្រោះយោបល់ជាមុន និងការព្រមព្រៀង (PNPCA) និងដើម្បីប្រមូលនូវរាល់អនុសាសន៍ពីអ្នកចូលរួមទាំងអស់លើឯកសារគម្រោង ប៉ាក់ឡាយ ដែលភាគីឡាវបានបញ្ជូនមក សម្រាប់ការពិគ្រោះយោបល់ជាមុន និងការពិនិត្យឡើងវិញផ្នែកបច្ចេកទេសលើឯកសារគម្រោង ប៉ាក់ឡាយ ដែលបានធ្វើឡើងដោយលេខាធិការដ្ឋាន គណៈកម្មការទន្លេមេគង្គ។ សូមជម្រាបជូនថា គម្រោងវារីអគ្គីសនី ប៉ាក់ឡាយ នេះ ជាគម្រោងលើទន្លេមេទី៤ របស់ឡាវ បន្ទាប់ពីគម្រោង សាយ៉ាបូរី គម្រោងដនសាហុង និងគម្រោង ប៉ាក់បេង៕