វៀងច័ន្ទ៖ លោក អ៊ូ សុផាណា ប្រធាននាយកដ្ឋានរដ្ឋបាល និងហិរញ្ញវត្ថុ និងជាមន្ត្រីសម្របសម្រួលថ្នាក់ជាតិ សម្រាប់ការងារមេគង្គ លោក ហាក់ សុជាតិ ប្រធាននាយកដ្ឋានផែនការ និងសហប្រតិបត្តិការអន្តរជាតិ លោក សុខ ខុម ប្រធាននាយកដ្ឋានបណ្ដាគម្រោង និងកម្មវិធី លោក ឈាង ហុង ប្រធាននាយកដ្ឋានគ្រប់គ្រងព័ត៌មាន និងចំណេះដឹង នៃអគ្គលេខាធិការដ្ឋាន គណៈកម្មាធិការជាតិទន្លេមេគង្គកម្ពុជា និងលោក យិន សាវុធ ប្រធាននាយកដ្ឋានជលសាស្ត្រ និងការងារទន្លេ នៃក្រសួងធនធានទឹក និងឧតុនិយម បានចូលរួមកិច្ចប្រជុំពិគ្រោះយោបល់ថ្នាក់តំបន់ លើសេចក្តីព្រាងផែនការការងារ របស់គណ:កម្មការទន្លេមេគង្គ ឆ្នាំ២០១៩ ដោយមានការចូលរួមពីក្រុមការងារនៃប្រទេសជាសមាជិក គណៈកម្មការទន្លេមេគង្គ ដៃគូអភិវឌ្ឍន៍ និងមន្ត្រីលេខាធិការដ្ឋាន MRC។
គោលបំណងនៃកិច្ចប្រជុំពិភាក្សាកម្រិតបច្ចេកទេសនេះ ធ្វើឡើងដើម្បីពិនិត្យមើល និងពិភាក្សាកែសម្រួលឡើងវិញនូវបណ្តាសកម្មភាព និងថវិកា តាមផ្នែកទាំងបួន៖ ការងារគាំទ្រដំណើរការរដ្ឋបាល ការងារផែនការ ការងារគ្រប់គ្រងបរិស្ថាន និងការងារគាំទ្របច្ចេកទេស នៃលេខាធិការដ្ឋាន គណៈកម្មការទន្លេមេគង្គ ដែលមាននៅក្នុងសេចក្តីព្រាងផែនការងារឆ្នាំ២០១៩ នេះ។
លទ្ធផលពីកិច្ចប្រជុំពិគ្រោះយោបល់ថ្ងៃនេះ នឹងបញ្ជូនទៅពិភាក្សាសុំការណែនាំពីតម្រូវការថវិកា នៅក្នុងកិច្ចប្រជុំគណៈកម្មការថវិកា របស់គណៈកម្មការទន្លេមេគង្គ នៅថ្ងៃទី១៥ ខែវិច្ឆិកា បន្ទាប់មកសេចក្តីព្រាងចុងក្រោយនៃផែនការការងារសម្រាប់ឆ្នាំ២០១៩ នេះ នឹងដាក់សុំការអនុម័ត និងឯកភាពពីគណៈកម្មាធិការរួម និងក្រុមប្រឹក្សា ក្នុងកិច្ចប្រជុំក្រុមប្រឹក្សាលើកទី២៥ នាចុងខែវិច្ឆិកា ឆ្នាំ២០១៨៕