វៀងច័ន្ទ៖ ឯកឧត្តម តែ ណាវុធ អគ្គលេខាធិការ គណៈកម្មាធិការជាតិទន្លេមេគង្គកម្ពុជា បានដឹកនាំក្រុមការងារកម្ពុជា ដែលមានសមាសភាពមកពីក្រសួងធនធានទឹក និងឧតុនិយម ក្រសួងបរិស្ថាន រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ក្រសួងរ៉ែ និងថាមពល និងអគ្គលេខាធិការដ្ឋាន គណៈកម្មាធិការជាតិទន្លេមេគង្គកម្ពុជា បានចូលរួមកិច្ចប្រជុំលើកទី២ របស់ក្រុមការងារ MRC PNPCA JCWG ស្តីពី ការពិគ្រោះយោបល់ជាមុននៃសំណើគម្រោងវារីអគ្គិសនី ប៉ាក់ឡាយ របស់ឡាវ ដោយមានការចូលរួមពីមន្ត្រីក្រុមងារ JC PNPCA នៃប្រទេសជាសមាជិក គណៈកម្មការទន្លេមេគង្គ មន្ត្រី MRCS ជំនាញការអន្តរជាតិ ម្ចាស់គម្រោង និងមន្ត្រីនៃក្រសួងរ៉ែ និងថាមពលរបស់ឡាវ។
កិច្ចប្រជុំនេះធ្វើឡើងដើម្បី៖
១/ ពិភាក្សា និងផ្តល់យោបល់លើសេចក្តីព្រាងលើកទី១ របាយការណ៍បច្ចេកទេស របកគំហើញពីឯកសារសំណើគម្រោងវារីអគ្គិសនី ប៉ាក់ឡាយ
២/ ពិនិត្យកែសម្រួលឱ្យមានភាពប្រសើរឡើងនូវវិធីសាស្ត្រវាយតម្លៃ និងលទ្ធផលនៃសេចក្តីព្រាងលើកទី១ របាយការណ៍បច្ចេកទេស
៣/ ចែករំលែក និងពិភាក្សា លើរបកគំហើញបឋមរបស់ថ្នាក់ជាតិ លើការពិនិត្យមើលលើឯកសារបច្ចេកទេសនៃសំណើគម្រោង ប៉ាក់ឡាយ និងលទ្ធផលនៃកិច្ចប្រជុំថ្នាក់ជាតិលើកទី១
៤/ ពិនិត្យ ពិភាក្សា និងឯកភាពលើការផ្តល់យោបល់ពីវេទិកាថ្នាក់តំបន់លើកទី១ លើសំណើគម្រោងប៉ាក់ឡាយ និង
៥/ ពិភាក្សា និងឯកភាពលើសំណើរៀបចំវេទិកាលើកទី២ និងកិច្ចប្រជុំលើកទី៣ របស់ JCWG។
នៅថ្ងៃទី០៧ ខែវិច្ឆិកា ឆ្នាំ២០១៨ ក្រុមការងារបានធ្វើដំណើរទស្សនកិច្ច ចុះពិនិត្យទីតាំងគម្រោងទំនប់វារីអគ្គិសនី ប៉ាកឡាយ របស់ឡាវ លើដងទន្លេមេគង្គ ដោយមានក្រុមការងារថ្នាក់តំបន់ និងក្រុមការងារអន្តរ-ក្រសួងកម្ពុជា នៅស្រុកប៉ាក់ឡាយ ខេត្តសាយ៉ាប៊ូរី៕