ភ្នំពេញ៖ ឯកឧត្តម តែ ណាវុធ អនុប្រធានអចិន្ត្រៃយ៍ គណៈកម្មាធិការជាតិទន្លេមេគង្គកម្ពុជា បានដឹកនាំសិក្ខាសាលាថ្នាក់ជាតិស្តីពី សេចក្តីព្រាងចុងក្រោយ នៃរបាយការណ៍សិក្សាបឋម សម្រាប់ការគ្រប់គ្រងហានិភ័យពីទឹកជំនន់ ដោយមានការចូលរួមពីមន្ត្រីតំណាងជាន់ខ្ពស់ និងមន្ត្រីជំនាញ មកពីក្រសួងធនធានទឹក និងឧតុនិយម មន្ទីរធនធានទឹក និងឧតុនិយមខេត្តពាក់ព័ន្ធ ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ ក្រសួងសាធារណការ និងដឹកជញ្ជូន គណៈកម្មាធិការជាតិគ្រប់គ្រងគ្រោះមហន្តរាយ អាជ្ញាធរទន្លេសាប តំណាងលេខាធិការដ្ឋាន MRC និងអគ្គលេខាធិការដ្ឋាន គណៈកម្មាធិការជាតិទន្លេមេគង្គកម្ពុជា។
គោលបំណងនៃសិក្ខាសាលាគឺដើម្បី ជម្រាបជូនអ្នករៀបចំគោលនយោបាយ អ្នកធ្វើសេចក្តីសម្រេចចិត្ត និងអ្នករៀបចំផែនការ អ្នកសិក្សាស្រាវជ្រាវ និងប្រមូលអនុសាសន៍សម្រាប់កែលម្អររបាយការណ៍ ដែលគ្រោងនឹងបញ្ចប់នៅខែកក្កដា ឆ្នាំ២០២០៕