ភ្នំពេញ៖ ឯកឧត្តម តែ ណាវុធ អនុប្រធានអចិន្រ្តៃយ៍ ឯកឧត្តម សូ សុភ័ទ្ទ អគ្គលេខាធិការ ឯកឧត្តម វ៉ាត់ បុត្តកុសល និងឯកឧត្តម ឡុង សារាវុធ អគ្គលេខាធិការរង លោក ឈាង ហុង ប្រធាននាយកដ្ឋានគ្រប់គ្រងព័ត៌មាន និងចំណេះដឹង និងលោក សួស ប៊ុនថន ប្រធាននាយកដ្ឋានផែនការ និងសហប្រតិបត្តិការអន្តរជាតិ នៃគណៈកម្មាធិការជាតិទន្លេមេគង្គកម្ពុជា បានជួបពិភាក្សាតាមរយៈ Video Conference អំពី ចក្ខុវិស័យមេគង្គ៣.០ របស់ធនាគារពិភពលោក ជាមួយមន្រ្តីធនាគារពិភពលោក រួមមាន លោក ចាន់ វីរៈ លោកស្រី Shelley Mcmillan អ្នកឯកទេសគ្រប់គ្រងធនធានទឹកជាន់ខ្ពស់ និងលោកស្រី Klomjit Chandrapanya អ្នកឯកទេស សហប្រតិបត្តិការមេគង្គ។
ចក្ខុវិស័យមេគង្គ ៣.០ របស់ធនាគារពិភពលោក គឺជាជំនួយតំណាក់កាលទី៣ របស់ធនាគារពិភពលោក ដែលបានបន្តពីលើកទី១ កាលពីឆ្នាំ ១៩៩៨-២០០៨ និងលើកទី២ ២០០៨-២០១៨ និងលើកទី៣នេះ ពីឆ្នាំ២០២០ តទៅ ដែលមានគោលបំណងជំរុញការយល់ដឹងរួមគ្នា សម្រាប់ការប្រើប្រាស់ធនធានអាងទន្លេមេគង្គ ឱ្យកាន់តែប្រសើរឡើង និងកំណត់ទិសដៅថ្មី សម្រាប់កិច្ចសហប្រតិបត្តិការក្នុងតំបន់។
ចក្ខុវិស័យទន្លេមេគង្គ ៣.០ ត្រូវបានរៀបចំឡើងដើម្បី (១) ការយល់ដឹងពីទន្លេមេគង្គ (២) ការឱ្យតម្លៃទៅលើទន្លេមេគង្គ និង (៣) ការគ្រប់គ្រងទន្លេមេគង្គ។ ឯកឧត្តម តែ ណាវុធ បានសំដែង ការអបអរសារទរ និងគាំទ្រសម្រាប់ចក្ខុវិស័យទន្លេមេគង្គ ៣.០ របស់ធនាគារពិភពលោក និងបានស្នើសុំធនាគារពិភពលោកអនុវត្តន៍ដោយបន្តជំនួយគាំទ្រដល់គណៈកម្មការទន្លេមេគង្គ និងប្រទេសជាសមាជិក ក្នុងផែនការវិនិយោគធនធានទឹក ដូចជាសំណង់ហេដ្ឋារចនាសម្ព័ន្ធទឹកគាំទ្រកសិកម្មស្រោចស្រព ការពារទប់ស្កាត់ទឹកជំនន់ និងគ្រោះរាំងស្ងួត និងរំហូរទឹកចូលទៅក្នុងទន្លេសាប ដែលប្រទេសកម្ពុជាបានកំពុងជួបប្រទះ៕