កិច្ចប្រជុំលើកទី១០ របស់ក្រុមសម្របសម្រួលជំនួយបច្ចេកទេស នៃកម្មវិធីគ្រប់គ្រងព័ត៌មាន និងចំណេះដឹង នៃគណៈកម្មការទន្លេមេគង្គ (ថ្ងៃទី ០៣-០៤ ខែកុម្ភៈ ឆ្នាំ២០១៥)
(MRC-IKMP)
ហាណូយ៖ កិច្ចប្រជុំរបស់ក្រុមសម្របសម្រួលជំនួយបច្ចេកទេស នៃកម្មវិធីគ្រប់គ្រងព័ត៌មាន និងចំណេះដឹង នៃគណៈកម្មការទន្លេមេគង្គ (TACT) បានប្រព្រឹត្តទៅនៅទីក្រុងហាណូយ ប្រទេសវៀតណាម ក្រោមការដឹកនាំរបស់តំណាងលេខាធិការដ្ឋានគណៈកម្មការទន្លេមេគង្គ និងដោយមានការចូលរួមពីសមាជិកក្រុមការងារ សម្របសម្រួលជំនួយបច្ចេកទេស ជំនាញការពីក្រសួងពាក់ព័ន្ធ នៃប្រទេសជាសមាជិក តំណាងអង្គការអន្តរជាតិដែលបង្កើតកម្មវិធីម៉ូដែល និងក្រុមការងារលេខាធិការដ្ឋានគណៈកម្មការទន្លេមេគង្គ សរុបចំនួន ២៦រូប។ ដោយឡែក សមាសភាពចូលរួមពីកម្ពុជាដឹកនាំដោយ លោក ឈាង ហុង ប្រធាននាយកដ្ឋានគ្រប់គ្រងព័ត៌មាន និងចំណេះដឹង នៃគណៈកម្មាធិការជាតិទន្លេមេគង្គកម្ពុជា និងលោក គឺ ខេមលីន មន្ត្រីសម្របសម្រួលកម្មវិធីគ្រប់គ្រងព័ត៌មាន និងចំណេះដឹង នៃគណៈកម្មាធិការជាតិទន្លេមេគង្គកម្ពុជា អមដោយសមាជិក TACT មកពីក្រសួងជំនាញ និងអ្នកជំនាញ។
កិច្ចប្រជុំបានពិនិត្យលើវឌ្ឍន៍ភាពការងារ ដែលបានអនុវត្តន៍កន្លងមក ចាប់តាំងពីកិច្ចប្រជុំលើកទី៩ របស់ TACT និងប្រកាសឱ្យប្រើប្រាស់ផលិតផល របស់កម្មវិធីគ្រប់គ្រងព័ត៌មាន និងចំណេះដឹង ក្នុងនោះមាន (១) ផែនទីគំរបព្រៃឈើឆ្នាំ២០១០ (២) ប្រព័ន្ធគេហទំព័រព័ត៌មាន និង(៣) ឧបករណ៍បច្ចេកទេស (e-Water source) សម្រាប់ជំនួយដល់ការសិក្សារបស់ក្រុមប្រឹក្សា សំដៅជម្រុញដល់ការចែករំលែកទិន្នន័យ និងព័ត៌មាន ប្រកបដោយតម្លាភាព និងគុណភាព ដល់គម្រោងកម្មវិធីនានារបស់គណៈកម្មការទន្លេមេគង្គ អ្នកធ្វើសេចក្តីសម្រេចចិត្ត អ្នកសិក្សាស្រាវជ្រាវ និងអ្នកពាក់ព័ន្ធមេគង្គ។ អង្គប្រជុំបានចាត់ទុកថា កិច្ចសហការជាមួយកម្មវិធីពាក់ព័ន្ធក្នុងការផ្តល់សេវាកម្ម និងផលិតផល ក្នុងប្រព័ន្ធព័ត៌មានរបស់គណៈកម្មការទន្លេមេគង្គ(MRC-IS) តាមរយៈកម្មវិធីគ្រប់គ្រងព័ត៌មាន និងចំណេះដឹង ជាដំណោះស្រាយប្រកបដោយសមហេតុផលតាមបែបវិទ្យាសាស្ត្រ របស់គណៈកម្មការទន្លេមេគង្គ ក្នុងការពង្រឹងការងារសម្របសម្រួល ក្នុងកិច្ចសហប្រតិបត្តិការមេគង្គ ជាមួយបណ្តាប្រទេស និងអ្នកពាក់ព័ន្ធតាមដងទន្លេមេគង្គ និងភាពជាដៃគូ។ អង្គប្រជុំក៏បានទទួលស្គាល់អំពីបញ្ហាប្រឈម និងជម្រុញឱ្យកម្មវិធីបង្កើនល្បឿននៃការអនុវត្តសកម្មភាពការងារ ជាមួយការពង្រឹងសមត្ថភាពការងារនៅថ្នាក់ជាតិមុនឆ្នាំ២០១៥ និងបានគិតគូរអំពីយុទ្ធសាស្ត្រសម្រាប់អនុវត្តន៍ការងាររបស់គណៈកម្មការទន្លេមេគង្គនៅក្រោយឆ្នាំ២០១៥ នៅពេលដែលប្រទេសជាសមាជិកមេគង្គចាប់ផ្តើមអនុវត្តវិមជ្ឈការមុខងារស្នូល។
កិច្ចប្រជុំលើកទី១១ របស់គណៈកម្មាធិការសម្របសម្រួលជំនួយបច្ចេកទេសគ្រោងនឹងប្រព្រឹត្តទៅនៅខែកក្កដា ឆ្នាំ២០១៥ នៅប្រទេសថៃ៕
Hits: 3305