កិច្ចប្រជុំលើកទី៣ ស្ដីពីការរៀបចំយន្តការរួម សម្រាប់ការអនុវត្តនីតិវិធីទាំង៥ របស់គណៈកម្មការទន្លេមេគង្គ (ថ្ងៃទី ៣១ ខែតុលា - ០១ ខែវិច្ឆិកា ឆ្នាំ២០១៦)
ហាណូយ៖ ឯកឧត្តម សូ សុភ័ទ្ទ អគ្គលេខាធិការរង នៃគណៈកម្មាធិការជាតិទន្លេមេគង្គកម្ពុជា បានដឹកនាំប្រតិភូអន្តរក្រសួងចំនួន ០៧រូប ដែលមានតំណាងមកពីក្រសួងធនធានទឹក និងឧតុនិយម ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ និងគណៈកម្មាធិការជាតិទន្លេមេគង្គកម្ពុជា ចូលរួមកិច្ចប្រជុំលើកទី៣ ស្ដីពីការរៀបចំយន្តការរួម សម្រាប់ការអនុវត្តនីតិវិធីទាំង៥ (នីតិវិធីស្ដីពីការចែករំលែកទិន្នន័យ និងព័ត៌មាន នីតិវិធីស្ដីពីការត្រួតពិនិត្យការប្រើប្រាស់ទឹកក្នុងទន្លេមេ នីតិវិធីស្ដីពីការរក្សាលំហូក្នុងទន្លេមេ នីតិវិធីស្ដីពីការជូនដំណឹង ការពិគ្រោះយោបល់ជាមុន និងការព្រមព្រៀង និងនីតិវិធីស្ដីពីគុណភាពទឹក)ពីថ្ងៃទី ៣១ ខែតុលា - ០១ ខែវិច្ឆិកា ឆ្នាំ២០១៦ នៅទីក្រុងហាណូយ ប្រទេសវៀតណាម។
គោលបំណងនៃកិច្ចប្រជុំគឺដើម្បី៖
- រាយការណ៍អំពីវឌ្ឍនភាពនៃការអនុវត្តនីតិវិធីទាំង៥ រួមទាំងបណ្តាគោលការណ៍បច្ចេកទេស និងកំណត់ទិសដៅការងារបន្ត
- ធ្វើសេចក្ដីរាយការណ៍ និងសុំការណែនាំក្នុងការរៀបចំឯកសារពាក់ព័ន្ធ បទពិសោធន៍នៃការអនុវត្តនីតិវិធីស្ដីពីការជូនដំណឹង ការពិគ្រោះយោបល់ជាមុន និងការព្រមព្រៀង
- បង្ហាញជូនអំពីឯកសារទស្សនទានសម្រាប់ការពិគ្រោះយោបល់ជាមុន លើគម្រោងវារីអគ្គិសនី ផាក់ បេង
- ពិភាក្សាលើលទ្ធភាពនៃការប្រើប្រាស់ ការវាយតម្លៃហេតុប៉ះពាល់បរិស្ថានឆ្លងដែន TbEIA RSAT សម្រាប់គម្រោង ផាក បេង
- ពិភាក្សាលើឯកសារល័ក្ខខ័ណ្ឌការងារសម្រាប់យន្តការរួម (Joint Platform) និងផែនការការងារសម្រាប់ឆ្នាំ២០១៧ ស្ដីពីយន្តការរួមនេះ៕
