សៀមរាប៖ ឯកឧត្តម តែ ណាវុធ អគ្គលេខាធិការ គណៈកម្មាធិការជាតិទន្លេមេគង្គកម្ពុជា បានដឹកនាំសិក្ខាសាលាផ្សព្វផ្សាយស្តីពី ការចាប់ផ្តើមអនុវត្តសមាសភាគទី២ នៃគម្រោងគ្រប់គ្រងធនធានទឹកចម្រុះមេគង្គ តំណាក់កាលទី៣ នៅសណ្ឋាគារអប្សរាអង្គរ ខេត្តសៀមរាប ដោយមានសមាសភាពចូលរួមចំនួន ៤០រូប រួមមាន មន្រ្តីក្រុមការងារអនុវត្តគម្រោងរបស់អគ្គលេខាធិការដ្ឋាន គណៈកម្មាធិការជាតិទន្លេមេគង្គកម្ពុជា នាយកដ្ឋានជលសាស្ត្រ និងការងារទន្លេ នាយកដ្ឋានឧតុនិយម នាយកដ្ឋានអភិរក្ស និងគ្រប់គ្រងធនធានទឹក នៃក្រសួងធនធានទឹក និងឧតុនិយម មន្ត្រីជំនាញមកពីមន្ទីរធនធានទឹក និងឧតុនិយម នៃខេត្តក្រចេះ ស្ទឹងត្រែង រតនគិរី និងខេត្តមណ្ឌលគីរី ព្រមទាំងមានការចូលរួមពី
មន្ត្រីតំណាងរដ្ឋបាលជលផល ក្រសួងសេដ្ឋកិច្ច និងហិរញ្ញវត្ថុ និងធនាគារពិភពលោក.
គោលបំណងនៃសិក្ខាសាលាផ្សព្វផ្សាយនេះគឺ ទី១- ជម្រាបជូនពីការចាប់ផ្តើមដំណើរការអនុវត្តជាផ្លូវការគម្រោងគ្រប់គ្រងធនធានទឹកចម្រុះមេគង្គ តំណាក់កាលទី៣ ទី២- ពិភាក្សាផ្នែកបច្ចេកទេសអំពីគម្រោងគ្រប់គ្រងធនធានទឹក ឧតុនិយម បញ្ហាឆ្លងដែន និងការគ្រប់គ្រងទន្លេនៅភូមភាគឦសាននៃប្រទេសកម្ពុជា និង ទី៣- ការចែករំលែក និងពិភាក្សាអំពីគោលបំណង វិសាលភាពនៃការងារទទួលខុសត្រូវ ការកសាងសមត្ថភាព និងការផ្ទេរជំនាញពីក្រុមប្រឹក្សាបច្ចេកទេស នៃសមាសភាគទី២ នៃគម្រោងនេះ៕
