ភ្នំពេញ៖ ឯកឧត្តម វ៉ាត់ បុត្តកុសល អគ្គលេខាធិការរង និងលោក សួស ប៊ុនថន ប្រធាននាយកដ្ឋានផែនការ និងសហប្រតិបត្តិការអន្តរជាតិ នៃគណៈកម្មាធិការជាតិទន្លេមេគង្គកម្ពុជា បានចូលរួមកិច្ចប្រជុំអន្តរក្រសួង ដើម្បីពិភាក្សាកែសម្រួលបញ្ជីសូចនាករ គោលដៅអភិវឌ្ឍប្រកបដោយចីរភាពកម្ពុជា (គ.អ.ច.ក) ២០១៦-២០៣០ ដែលរៀបចំដោយក្រសួងផែនការ។ កិច្ចប្រជុំនេះ ដឹកនាំដោយឯកឧត្តម ទួន ថាវរៈ រដ្ឋលេខាធិការ ក្រសួងផែនការ និងមានមន្រ្តីមកពីក្រសួង ស្ថាប័នពាក់ព័ន្ធ។
គោលបំណងនៃកិច្ចប្រជុំគឺ ដើម្បីពិនិត្យ និងកែសម្រួលសូចនាករមួយចំនួនពាក់ព័ន្ធ ដែលបានស្នើឡើងដោយក្រសួងពាក់ព័ន្ធកន្លងមក ដែលនឹងអាចស្នើដក ឬបន្ថែមសូចនាករឡើងវិញ។ អង្គប្រជុំបានពិភាក្សាទៅលើគោលដៅ ១៨ចំណុចដៅ ៨៨ និងសូចនាករ ១៤៨។ លោក ឃ្លោក សំអាង ប្រធាននាយកដ្ឋានផែនការ និងសហប្រតិបត្តិការអន្តរជាតិ តំណាងក្រសួងធនធានទឹក និងឧតុនិយម បានឯកភាព និងបានលើកសំណើរួមគ្នា សុំឱ្យអង្គប្រជុំពិនិត្យ និងទទួលយកសម្រាប់គោលដៅ ៦ចំណុចដៅ ៦.៥ គឺសូចនាករពីរគឺ៖ ៦.៥.១ ពាក់ព័ន្ធនឹងការគ្រប់គ្រងធនធានទឹកចម្រុះ ដែលទទួលបន្ទុកដោយក្រសួងធនធានទឹក និងឧតុនិយម និងសូចនាករ ៦.៥.២ ពាក់ព័ន្ធនឹងកិច្ចសហប្រតិបត្តិការទឹក និងអាងទន្លេឆ្លងដែន ដែលទទួល បន្ទុកដោយគណៈកម្មាធិការជាតិទន្លេមេគង្គកម្ពុជា ឯការកំណត់និយមន័យ និងប្រភេទទិន្នន័យជាធាតុចូល នឹងត្រូវបញ្ជូនទៅក្រសួងផែនការ នៅពេលក្រោយ៕