ជួបប្រជុំរួមក្រុមការងារគម្រោង គ្រប់គ្រងធនធានទឹកចម្រុះឆ្លងដែនក្នុងតំបន់ដីសណ្តទន្លេមេគង្គ និងតំបន់សេសាន-ស្រែពក (ថ្ងៃទី ១៨-១៩ ខែតុលា ឆ្នាំ ២០១៨)
វៀតណាម៖ ឯកឧត្តម តែ ណាវុធ អគ្គលេខាធិការ គណៈកម្មាធិការជាតិទន្លេមេគង្គកម្ពុជា និងឯកឧត្តម ម៉ៅ ហាក់ អគ្គលេខាធិការរង អាជ្ញាធរទន្លេសាប បានដឹកនាំក្រុមការងារគម្រោង គ្រប់គ្រងធនធានទឹកចម្រុះឆ្លងដែន ក្នុងតំបន់ដីសណ្តទន្លេមេគង្គ និងតំបន់សេសាន-ស្រែពក របស់កម្ពុជា ជួបប្រជុំរួមជាមួយក្រុមការងារគម្រោង របស់វៀតណាម ដោយមានការចូលរួមពីមន្ត្រីលេខាធិការដ្ឋាន គណៈកម្មការទន្លេមេគង្គ និងតំណាងធនាគារពិភពលោក ដែលជាម្ចាស់ជំនួយលើគម្រោងទាំង០២នេះ។
កិច្ចប្រជុំរួមនេះគឺដើម្បី ១) ពិនិត្យលើអនុសាសន៍ និងកំណត់ទិសដៅសម្រាប់បញ្ចប់លើឯកសារជម្រើសយន្តការសម្របសម្រួលការគ្រប់គ្រងធនធានទឹកឆ្លងដែន ២) ពិភាក្សាលើការរៀបចំផែនការសកម្មភាពឆ្លងដែនរួម ៣) ពិភាក្សាលើជម្រើសសម្រាប់ទ្រទ្រង់ដល់ការអនុវត្តផែនការសកម្មភាពរួម និង ៤) ពិនិត្យលើស្ថានភាពនៃការអនុវត្តគម្រោង។ គម្រោង គ្រប់គ្រងធនធានទឹកចម្រុះឆ្លងដែនក្នុងតំបន់ដីសណ្តទន្លេមេគង្គ និងតំបន់សេសាន-ស្រែពក នេះ មានលទ្ធផលគោលចំនួន ៣ គឺ ១) ការកំណត់នូវបញ្ហាឆ្លងដែនរួម (ដែលលទ្ធផលគោលទី១ នេះបានបញ្ចប់ជាស្ថាពរ) ២) ការកំណត់នូវយន្តការសម្របសម្រួលឆ្លងដែន (ដែលនឹងត្រូវបញ្ចប់ក្រោយកិច្ចប្រជុំនេះ) និង ៣) ការរៀបចំផែនការសកម្មភាពរួម និងការអនុវត្ត (ដែលនឹងត្រូវរៀបចំឡើង និងអនុវត្តក្រោយកិច្ចប្រជុំនេះ)៕
