កិច្ចប្រជុំថ្នាក់ជាតិដើម្បីពិនិត្យ ពិភាក្សា និងផ្តល់យោបល់លើសេចក្តីព្រាងឯកសារ យុទ្ធសាស្ត្រអភិវឌ្ឍន៍អាងទន្លេមេគង្គ (ថ្ងៃទី១៨ ខែឧសភា ឆ្នាំ២០២០)
ភ្នំពេញ៖ កិច្ចប្រជុំថ្នាក់ជាតិដើម្បីពិនិត្យ ពិភាក្សា និងផ្តល់យោបល់លើសេចក្តីព្រាង ឯកសារយុទ្ធសាស្ត្រអភិវឌ្ឍន៍អាងទន្លេមេគង្គ BDS ២០២១-២០៣០ និងផែនការយុទ្ធសាស្ត្រ ២០២១-២០២៥ របស់គណៈកម្មការទន្លេមេគង្គ និងការរៀបចំឯកសារផែនការយុទ្ធសាស្ត្រ២០២១-២០២៥ របស់គណៈកម្មាធិការជាតិទន្លេមេគង្គកម្ពុជា ដឹកនាំដោយឯកឧត្តម តែ ណាវុធ អនុប្រធានអចិន្ត្រៃយ៍ គណៈកម្មាធិការជាតិទន្លេមេគង្គកម្ពុជា និងការចូលរួមពីមន្ត្រីតំណាងក្រសួង ស្ថាប័នពាក់ព័ន្ធរួមមាន ក្រសួងធនធានទឹក និងឧតុនិយម ក្រសួងបរិស្ថាន ក្រសួងសាធារណការ និងដឹកជញ្ជូន ក្រសួងរ៉ែ និងថាមពល ក្រសួងរៀបចំដែនដី នគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ ក្រុមប្រឹក្សាអភិវឌ្ឍន៍កម្ពុជា អាជ្ញាធរទន្លេសាប និងមន្រ្តីអគ្គលេខាធិការដ្ឋាន គណៈកម្មាធិការជាតិទន្លេមេគង្គកម្ពុជា។
កិច្ចប្រជុំនេះ បានប្រព្រឹត្តទៅដោយ (១) បានជម្រាបជូនដោយឡែក អំពីគ្រោងប្លង់ និងផែនទីបង្ហាញផ្លូវការងារ សម្រាប់ការកសាងផែនការយុទ្ធសាស្ត្រ២០២១-២០២៥ របស់គណៈកម្មាធិការជាតិទន្លេមេគង្គកម្ពុជា (២) បានពិនិត្យទូទៅលើគ្រោងប្លង់ និងផ្នែកខ្លឹមសារសង្ខេបនៃជំពូកសំខាន់ៗ របស់យុទ្ធសាស្ត្រអភិវឌ្ឍន៍អាងទន្លេ និងផែនការយុទ្ធសាស្ត្រគណៈកម្មការទន្លេមេគង្គ និង (៣) បានពិនិត្យ និងឯកភាពលើការកំណត់យុទ្ធសាស្ត្រជាអាទិភាពក្នុងលទ្ធផលរួម និងធាតុចូល នៃ BDS និងលទ្ធផល សកម្មភាព និងសូចនាករ នៃផែនការយុទ្ធសាស្ត្រ SP ដោយប្រមូលនូវមតិយោបល់ទាំងអស់ សម្រាប់កិច្ចប្រជុំនាពេលនេះ ជាពិសេសចំណុចទី 2 & 3 នឹងដាក់ជូនសម្រាប់កិច្ចប្រជុំពិគ្រោះយោបល់ថ្នាក់ជាតិម្តងទៀត និងថ្នាក់តំបន់ នាពេលខាងមុខ៕