កិច្ចប្រជុំពិគ្រោះយោបល់ថ្នាក់តំបន់ស្តីពី កិច្ចសហប្រិបត្តិការសម្រាប់ការសម្របសម្រួល និងការគ្រប់គ្រងប្រតិបត្តិការ នៃគម្រោងវារីអគ្គិសនី (ថ្ងៃទី២២ ខែធ្នូ ឆ្នាំ២០២០)
ភ្នំពេញ៖ ឯកឧត្តម គល់ វឌ្ឍនា អគ្គលេខាធិការរង គណៈកម្មាធិការជាតិទន្លេមេគង្គកម្ពុជា និងជាប្រធានក្រុមការងារ គណៈកម្មាធិការរួម គណៈកម្មការទន្លេមេគង្គ ទទួលខុសត្រូវលើការអនុវត្តនីតិវិធីស្ដីពី ការជូនដំណឹង ការពិគ្រោះយោបល់ជាមុន និងការព្រមព្រៀង (PNPCA JCWG) របស់កម្ពុជា បានដឹកនាំក្រុមការងារកម្ពុជា មានតំណាងមកពីក្រសួងធនធានទឹក និងឧតុនិយម ក្រសួងបរិស្ថាន ក្រសួងរ៉ែ និងថាមពល ក្រសួងកសិកម្ម រុក្ខាប្រមាញ់ និងនេសាទ ក្រសួងសាធារណការ និងដឹកជញ្ជូន អគ្គិសនីកម្ពុជា និងមន្រ្តីនៃអគ្គលេខាធិការដ្ឋាន គណៈកម្មាធិការជាតិទន្លេមេគង្គកម្ពុជា ចូលរួមកិច្ចប្រជុំពិគ្រោះយោបល់ថ្នាក់តំបន់ តាមរយៈ VDO Conference ស្តីពី កិច្ចសហប្រិបត្តិការសម្រាប់ការសម្របសម្រួល និងការគ្រប់គ្រងប្រតិបត្តិការនៃគម្រោងវារីអគ្គិសនីបណ្តាក់គ្នា ក្នុងអាងទន្លេមេគង្គ ដែលបានប្រព្រឹត្តទៅក្រោមអធិបតីភាពលោកបណ្ឌិត អាន ពេជ្រហត្ថដា នាយកប្រតិបត្តិ នៃ MRCS និងចូលរួមដោយក្រុមការងារបច្ចេកទេសពាក់ព័ន្ធពីប្រទេសជាសមាជិកគណៈកម្មការទន្លេមេគង្គ (កម្ពុជា ឡាវ ថៃ និងវៀតណាម) មន្រ្តីបច្ចេកទេសពាក់ព័ន្ធនៃ MRCS និងទីប្រឹក្សាបច្ចេកទេសអន្តរជាតិ។
កិច្ចប្រជុំមានគោលបំណង៖
១. បង្ហាញជូននូវសេចក្តីព្រាង នៃសំណើមាតិកាស្តីពី កាលានុវត្តភាពសម្រាប់ការរៀបចំដំណើរការ និងអភិបាលកិច្ច នៃប្រតិបត្តិការប្រកបដោយការសម្របសម្រួលលើបណ្តាទំនប់វារីអគ្គិសនីក្នុងអាងទន្លេមេគង្គ
២. បកស្រាយ និងពិភាក្សាលើក្របខ័ណ្ឌ និងតារាងដែលបានរៀបចំ ដើម្បីធ្វើការគិតគូរពិចារណាអំពីកាលានុត្តភាព សម្រាប់ប្រតិបត្តិការនៃហេដ្ឋារចនាសម្ព័ន្ធរូបវ័ន្តទឹក
៣. គិតគូរពិចារណាលើតារាងដែលបានរៀបចំ និងអភិក្រមក្នុងការកំណត់អាទិភាព នៃការតាមដាននូវកាលានុវត្តភាពទាំងនោះ
៤. ពិភាក្សាលើដំណើរការថ្នាក់ជាតិដែលមានស្រាប់ និងកំពុងអភិវឌ្ឍន៍នានា សម្រាប់ការសម្របសម្រួល និងការគ្រប់គ្រងប្រតិបត្តិការ នៃទំនប់វារីអគ្គិសនីបណ្តាក់គ្នា ក៏ដូចជាបទពិសោធន៍ជាមេរៀននៅថ្នាក់ជាតិនានា ដើម្បីចែករំលែកនៅថ្នាក់តំបន់ និង
៥. បង្ហាញជូន និងពិភាក្សាលើសំណើកិច្ចការបន្ត សម្រាប់សកម្មភាពនេះ។
អង្គប្រជុំបានស្តាប់ និងពិភាក្សាលើរបៀបវារៈចំនួនបួនគឺ៖
(១) សេចក្តីព្រាងមាតិកាស្តីពី កាលានុវត្តភាពសម្រាប់ការរៀបចំដំណើរការ និងអភិបាលកិច្ច នៃប្រតិបត្តិការប្រកបដោយការសម្របសម្រួលលើបណ្តាទំនប់វារីអគ្គិសនីក្នុងអាងទន្លេមេគង្គ
(២) សេចក្តីព្រាងក្របខ័ណ្ឌ សម្រាប់ធ្វើការគិតគូរពិចារណាអំពីកាលានុវត្តភាពសម្រាប់ប្រតិបត្តិការនៃហេដ្ឋារចនាសម្ព័ន្ធរូបវ័ន្តទឹក
(៣) សេចក្តីព្រាងតារាងកាលានុវត្តភាពសម្រាប់កិច្ចសហប្រតិបត្តិការស្តីពី ប្រតិបត្តិការនៃហេដ្ឋារចនាសម្ព័ន្ធទឹក និងលក្ខណៈវិនិច្ឆ័យសម្រាប់ការកំណត់អាទិភាព និង
(៤) សំណើកិច្ចការដែលត្រូវអនុវត្តន៍បន្តលើសកម្មភាពនេះ៕