កិច្ចប្រជុំក្រុមបច្ចេកទេសថ្នាក់តំបន់ស្តីពី លទ្ធផលបឋមពីការងារម៉ូដែល នៃការសិក្សារបស់ក្រុមប្រឹក្សានៃគណៈកម្មការទន្លេមេគង្គ (ថ្ងៃទី២៣ ខែសីហា ឆ្នាំ២០១៦)
ភ្នំពេញ៖ គណៈកម្មការទន្លេមេគង្គ បានរៀបចំកិច្ចប្រជុំក្រុមបច្ចេកទេសថ្នាក់តំបន់ស្តីពី លទ្ធផលបឋមពីការងារម៉ូដែល នៃការសិក្សារបស់ក្រុមប្រឹក្សា នៃគណៈកម្មការទន្លេមេគង្គ នៅលេខាធិការដ្ឋាន គណៈកម្មការទន្លេមេគង្គប្រចាំរាជធានីភ្នំពេញ ដោយមានការចូលរួមពីមន្ត្រីសម្របសម្រួលថ្នាក់ជាតិ និងមន្ត្រីបច្ចេកទេសនៃប្រទេសជាសមាជិក បុគ្គលិកលេខាធិការដ្ឋាន និងជំនាញការអន្តរជាតិ សរុបចំនួន ១៨រូប។
គោលបំណងនៃកិច្ចប្រជុំគឺដើម្បី (១) ពិនិត្យលើវឌ្ឍន៍ភាពការងារម៉ូដែល (២) ពិនិត្យលើបច្ចុប្បន្នភាពនៃចង្កោមសកម្មភាពការងារម៉ូដែល និងរបាយការណ៍បឋម និង (៣) ពិភាក្សាលើការងារបន្ទាប់សម្រាប់រៀបចំសេណារីយ៉ូ។
អង្គប្រជុំបានពិនិត្យ និងផ្តល់យោបល់លើវឌ្ឍន៍ភាពការងារម៉ូដែល និងឯកភាពជាគោលការណ៍លើផែនការសកម្មភាព ព្រមទាំងជម្រុញឱ្យមានការពន្លឿនការងារបច្ចុប្បន្នភាពទិន្នន័យទៅក្នុងម៉ូដែល និងបានស្នើឱ្យក្រុមការងារម៉ូដែល សមត្ថភាពរបស់ម៉ូដែល រួមមាន ក្របខណ្ឌធ្វើសេចក្តីសម្រេចចិត្ត (DSF: SWAT, IQQM and iSIS), eWater source និង WUP-FIN ដែលគាំទ្រដល់ការសិក្សារបស់ក្រុមប្រឹក្សា និងវិធីសាស្ត្រសម្រាប់ការសិក្សាតាមផ្នែកនីមួយៗ (ផ្នែកទី១: ធារាសាស្ត្រ និងការបង្វែរទឹក ផ្នែកទី២: កសិកម្ម និងការប្រើប្រាស់ដី ផ្នែកទី៣: ការប្រើប្រាស់ទឹកតាមផ្ទះ និងឧស្សាហកម្ម ផ្នែកទី៤: ការការពារទឹកជំនន់ ផ្នែកទី៥: វារីអគ្គិសនី និងផ្នែកទី៦: ការដឹកជញ្ជូនតាមផ្លូវទឹក)។ ដំណើរការនៃការសិក្សានេះ មានការយឺតយ៉ាវរហូតមកដល់ពេលនេះ ដោយសារមានការផ្លាស់ប្តូររចនាសម្ព័ន្ធរបស់គណៈកម្មការទន្លេមេគង្គ និងការជ្រើសរើសជំនាញការ។ ពេលវេលាសម្រាប់ការងារជំហានបន្តគឺចាប់ពីខែសីហា ឆ្នាំ២០១៦ ដល់ខែមីនា ឆ្នាំ២០១៧។ របាយការណ៍ សរុប ១៦ នឹងត្រូវផលិត ក្នុងនោះ របាយការណ៍ចំនួន ១១ ទាក់ទងនឹង DSF របាយការណ៍ចំនួន ៣ ទាក់ទងនឹង eWater source និងរបាយការណ៍ ចំនួន ១ ទាក់ទងនឹង WUP-FIN។
អង្គប្រជុំក៏បានសម្រេចឱ្យមានការពិគ្រោះយោបល់ជាមួយប្រទេស លើលទ្ធផលនៃការសិក្សា មុនពេលសិក្ខាសាលាថ្នាក់តំបន់ចុងក្រោយនៅចុងខែមីនា ឆ្នាំ២០១៧ និងវគ្គបណ្តុះបណ្តាលនៃការប្រើប្រាស់ឧបករណ៍ទាំងនោះ៕
