កិច្ចប្រជុំលើកទី៣ នៃក្រុមការងាររួម នៃគម្រោងគ្រប់គ្រងជលផលឆ្លងដែន រវាងខេត្តព្រៃវែង ប្រទេសកម្ពុជា និងខេត្តដុងថាប់ ប្រទេសវៀតណាម (ថ្ងៃទី ០៤-០៥ ខែមិថុនា ឆ្នាំ២០១៥)
(MRC-FP)
ដុងថាប់៖ លេខាធិការដ្ឋានគណៈកម្មការទន្លេមេគង្គ បានរៀបចំកិច្ចប្រជុំលើកទី៣ នៃក្រុមការងាររួមនៃគម្រោង គ្រប់គ្រងជលផលឆ្លងដែន រវាងខេត្តព្រៃវែង ប្រទេសកម្ពុជា និងខេត្តដុងថាប់ ប្រទេសវៀតណាម ដោយមានការចូលរួមពី សមាជិកក្រុមការងាររួម របស់គម្រោងមកពីប្រទេសទាំងពីរ មន្ត្រីសម្របសម្រួលថ្នាក់ជាតិកម្មវិធីជលផល មន្ត្រីគ្រប់គ្រងបច្ចេកទេសថ្នាក់ជាតិ មន្ត្រីពាក់ព័ន្ធកម្មវិធីជលផលរបស់គណៈកម្មការទន្លេមេគង្គ សរុបចំនួន ២៧រូប។ កិច្ចប្រជុំដឹកនាំដោយសហប្រធាន ឯកឧត្តម អាន ពេជ្រហត្ថដា អគ្គលេខាធិការរង នៃអគ្គលេខាធិការដ្ឋានគណៈកម្មាធិការជាតិទន្លេមេគង្គកម្ពុជា និងលោកស្រី Nguyen Hong Phuong នាយករង គណៈកម្មាធិការជាតិទន្លេមេគង្គវៀតណាម។
គោលបំណងនៃកិច្ចប្រជុំគឺ ដើម្បីពិនិត្យ និងពិភាក្សាលើជម្រើសសម្រាប់ កំណត់ការគ្រប់គ្រងជលផលរួមគ្នានៅក្នុងតំបន់អនុវត្តន៍គម្រោង។
អង្គប្រជុំបានឯកភាពយកបញ្ហាសំខាន់ចំនួន ០៣ សម្រាប់ពិភាក្សាលើជម្រើសសម្រាប់ ការកំណត់ការគ្រប់គ្រងជលផលរួមគ្នា ដែលក្នុងនោះមាន ការកំណត់តំបន់គ្រប់គ្រងរួមគ្នា បទដ្ឋានច្បាប់ជលផលនានា និងកំណត់យន្តការគ្រប់គ្រងរួមគ្នា។ ជារួមអង្គប្រជុំបានឯកភាពគ្នាយកប្រវែង ៥,៧ គីឡូម៉ែត្រ តាមបណ្តោយទន្លេតូចនៃទីតាំងអនុវត្តន៍គម្រោង ជាកន្លែងគ្រប់គ្រងជលផលរួមគ្នា ហើយបទដ្ឋានច្បាប់ជលផលពាក់ព័ន្ធអនុវត្តន៍ តាមបទដ្ឋានច្បាប់ប្រទេសរាងខ្លួន។ ចំពោះយន្តការគ្រប់គ្រងរួម អង្គប្រជុំបានឯកភាពយកយន្តការដែលមានស្រាប់ នៃកិច្ចប្រជុំទ្វេរភាគីរវាងខេត្តទាំងពីរក្នុងកំរិតថ្នាក់ខេត្ត ស្រុក និងឃុំ៕