ភ្នំពេញ៖ ឯកឧត្តម ឡុង សារាវុធ អគ្គលេខាធិការរង គណៈកម្មាធិការជាតិទន្លេមេគង្គកម្ពុជា បានដឹកនាំកិច្ចប្រជុំក្រុមការងារថ្នាក់ជាតិលើកទី៣ និងវគ្គបណ្តុះបណ្តាលស្តីពី ការគ្រប់គ្រងទឹកជំនន់ និងភាពរាំងស្ងួត នៅតំបន់ព្រំដែនកម្ពុជា-ថៃ ដោយមានការចូលរួមពីមន្រ្តីនៃបណ្តាក្រសួង ស្ថាប័នពាក់ព័ន្ធ (MOWRAM, MAFF, MOP, MRD, TSA, MPWT, NCDM and MLMUPC) មន្រ្តីមកពី ICEM, GIZ, MRCS ជំនាញការជាតិ ជំនាញការអន្តរជាតិ និងមន្រ្តីពី គ.ជ.ទ.ម.ក។
គោលបំណងនៃកិច្ចប្រជុំ និងវគ្គបណ្តុះបណ្តាលគឺដើម្បី (១) ពិភាក្សាពីថវិកា និងការរៀបចំឯកសារទស្សនទានពេញលេញបន្ថែម ដើម្បីដាក់ពាក្យស្នើសុំថវិកាពីមូលនិធិបរិស្ថានពិភពលោក (GEF) សម្រាប់គម្រោងដំណាក់កាលទី៣ (២) ពិភាក្សាពីផែនទីអាងទន្លេ និងតំបន់ដែលមានសក្តានុពល នៅ 9C និង 9T (៣)ពិភាក្សាលើផែនការការងារ សម្រាប់ត្រីមាសបន្ទាប់ (៤) ស្វែងយល់ពីការប្រើឧបករណ៍វាយតម្លៃ និងការជូនដំណឹងពីទឹកជំនន់ និងភាពរាំងស្ងួត ក្នុងកម្រិតអាងទន្លេ និង (៥) ស្វែងយល់ពីដំណោះស្រាយជាមូលដ្ឋានតាមធម្មជាតិ និងវិធានការកូនកាត់ ចំពោះភាពធន់នៃទឹកជំនន់ និងរាំងស្ងួត៕