សិក្ខាសាលាផ្សព្វផ្សាយស្តីពី ការពង្រឹងការយល់ដឹង និងការចូលរួមកិច្ចសហប្រតិបត្តិការមេគង្គ ក្នុងក្របខ័ណ្ឌគណៈកម្មាធិការជាតិទន្លេមេគង្គកម្ពុជា និងគណៈកម្មការទន្លេមេគង្គ (ថ្ងៃទី១៩-២០ ខែតុលា ឆ្នាំ២០១៥)
(CNMCS)
ពោធិសាត់៖ គណៈកម្មាធិការជាតិទន្លេមេគង្គកម្ពុជា បានរៀបចំសិក្ខាសាលាផ្សព្វផ្សាយស្តីពី ការពង្រឹងនូវការយល់ដឹង និងការចូលរួមកិច្ចសហប្រតិបត្តិការមេគង្គ ក្នុងក្របខ័ណ្ឌ គណៈកម្មាធិការជាតិទន្លេមេគង្គកម្ពុជា (CNMC) និងគណៈកម្មការទន្លេមេគង្គ (MRC) នៅខេត្តពោធិសាត់ ដែលដឹកនាំដោយឯកឧត្តម អាន ពេជ្រហត្ថដា អគ្គលេខាធិការរង CNMC និងមានការចូលរួមពីតំណាងមន្ទីរធនធានទឹក និងឧតុនិយម និងមន្ទីរផែនការមកពីខេត្ត-ក្រុងចំនួន ១៤ ជុំវិញបឹងទន្លេសាប និងតាមដងទន្លេមេគង្គ ក្នុងនោះរួមមានៈ ខេត្តបាត់ដំបង សៀមរាប កំពង់ធំ កំពង់ឆ្នាំង បន្ទាយមានជ័យ ពោធិសាត់ កំពង់ចាម ស្ទឹងត្រែង ក្រចេះ រតនគិរី មណ្ឌលគីរី កំពង់ស្ពឺ កណ្តាល និងខេត្តតាកែវ សរុបចំនួន ៣៥រូប។
គោលបំណងនៃសិក្ខាសាលានេះគឺ៖ ទី១- ជម្រាបជូនអំពីទិសដៅរបស់ MRC សម្រាប់ពេលអនាគត តាមរយៈការបង្ហាញជូននូវឯកសារយុទ្ធសាស្ត្រអភិវឌ្ឍន៍អាង (Basin Development Strategy) 2016-2020 ផែនការយុទ្ធសាស្ត្ររបស់ MRC 2016-2020 និងការកែទម្រង់រចនាសម្ព័ន្ធស្ថាប័ន MRC ទី២- ចែករំលែកការយល់ដឹងអំពីការលើកកំពស់យន្តការសម្របសម្រួល និងកិច្ចសហប្រតិបត្តិការរវាងគណៈកម្មាធិការជាតិទន្លេមេគង្គជាមួយក្រសួង-ស្ថាប័នពាក់ព័ន្ធក្នុងក្របខណ្ឌ MRC និង ទី៣- ចែករំលែក និងផ្លាស់ប្តូរបទពិសោធន៍ស្តីពី កិច្ចប្រឹងប្រែងក្នុងការអនុវត្តកិច្ចព្រមព្រៀងមេគង្គឆ្នាំ១៩៩៥ និងបណ្តានីតិវិធី គោលការណ៍ណែនាំបច្ចេកទេស ព្រមទាំងយុទ្ធសាស្ត្រកម្មវិធីនានារបស់ MRC។
ឯកឧត្តម អាន ពេជ្រហត្ថដា បានធ្វើបទបង្ហាញអំពីប្រវត្តិសង្ខេប និងកិច្ចសហប្រតិបត្តិការរវាង MRC និង CNMC និងជាមួយក្រសួង‑ស្ថាប័នពាក់ព័ន្ធ និងអំពីផលប្រយោជន៍រូបវ័ន្ត និងមិនរូបវ័ន្ត ផលប្រយោជន៍សេដ្ឋកិច្ច-ហិរញ្ញវត្ថូ និងផលប្រយោជន៍ពីសហប្រតិបត្តិការតំបន់ ដែលកម្ពុជាទទួលបានពីកិច្ចសហប្រតិបត្តិការជាមួយ MRC។ បញ្ជាក់ជូនពីសារៈសំខាន់នៃកិច្ចព្រមព្រៀងមេគង្គឆ្នាំ១៩៩៥ និងនីតិវិធីទាំង ៥ ព្រមទាំងចំណុចខ្វះខាត និងការលំបាកមួយចំនួនក្នុងការអនុវត្តកិច្ចព្រមព្រៀងនេះ។ ឯកឧត្តមក៏បានជម្រាបជូនផងដែរអំពី ការធ្វើកំណែទម្រង់រចនាសម្ព័ន្ធ និងហិរញ្ញវត្ថុរបស់ MRC ក្នុងពេលដំណើរការពី មជ្ឈការទៅ វិមជ្ឈការមុខងារស្នូលគ្រប់គ្រងអាងទន្លេ ដោយអនុលោមតាមសេចក្តីថ្លែងការណ៍នៃកិច្ចប្រជុំកំពូលលើកទី១ និងលើកទី២ របស់ MRC ប្រមុខរដ្ឋាភិបាលប្រទេសជាសមាជិកទាំងបួន កម្ពុជា ឡាវ ថៃ និងវៀតណាម ដែលបានបញ្ជាក់ពីការតាំងចិត្តមុតមាំលើស្វ័យភាពហិរញ្ញវត្ថុ នៅឆ្នាំ២០៣០៕
