កិច្ចប្រជុំរវាងក្រុមជំនាញការអន្តរជាតិ មកពី MRC ជាមួយក្រសួងធនធានទឹក និងឧតុនិយម និងអាជ្ញាធរទន្លេសាប (ថ្ងៃទី១០ ខែសីហា ឆ្នាំ២០១៧)
ភ្នំពេញ៖ មន្រ្តីគណៈកម្មាធិការជាតិទន្លេមេគង្គកម្ពុជា រួមមាន ឯកឧត្តម វ៉ាត់ បុត្តកុសល អគ្គលេខាធិការរង លោក ឈាង ហុង ប្រធាននាយកដ្ឋានគ្រប់គ្រងព័ត៌មាន និងចំណេះដឹង និងលោក សុខ ខុម ប្រធាននាយកដ្ឋានបណ្តាគម្រោង និងកម្មវិធី បានចូលរួមសម្របសម្រួល និងដឹកនាំកិច្ចប្រជុំរវាងក្រុមជំនាញការអន្តរជាតិ មកពីគណៈកម្មការទន្លេមេគង្គ ជាមួយក្រសួងធនធានទឹក និងឧតុនិយម និងអាជ្ញាធរទន្លេសាប នៅសាលប្រជុំក្រសួង ដោយមានការអញ្ជើញចូលរួមពីមន្ត្រីជំនាញនាយកដ្ឋានជលសាស្ត្រ និងការងារទន្លេ មន្រ្តីអាជ្ញាធរទន្លេសាប។
គោលបំណងនៃកិច្ចប្រជុំគឺ ដើម្បីពិភាក្សាលើលទ្ធផលនៃការសិក្សារបស់ក្រុមប្រឹក្សាគណៈកម្មការទន្លេមេគង្គ ដែលពាក់ព័ន្ធនឹងការពិចារណារបស់ក្រសួងជំនាញ ពីលទ្ធផលវាយតម្លៃផលប៉ះពាល់វិជ្ជមាន និងអវិជ្ជមាននៃការអភិវឌ្ឍ ផ្តោតសំខាន់ វារីអគ្គិសនី លើវិស័យផ្សេងទៀត។ បន្ទាប់ពីបានស្តាប់បទបង្ហាញ អង្គប្រជុំបានពិភាក្សា និងផ្តល់អនុសាសន៍ ជាពិសេស សម្រាប់ការរៀបចំសេណារីយ៉ូអភិវឌ្ឍន៍វារីអគ្គិសនី ដែលមានផលប៉ះពាល់ខ្លាំងលើផ្នែកជលផលនៅកម្ពុជា ដោយស្នើបញ្ចូលសេណារីយ៉ូ ហេដ្ឋារចនាសម្ព័ន្ធដោះស្រាយការកកដីល្បាប់នៅបាតអាង នៅគ្រប់សំណង់ទំនប់ ការរៀបចំប្រព័ន្ធគ្រប់គ្រងទឹកជំនន់ ប្រព័ន្ធធារាសាស្រ្តប្រកបដោយចីរភាព និងការកំណត់យុទ្ធសាស្រ្ត សម្រាប់ដំណោះស្រាយបញ្ហាផលប៉ះពាល់អវិជ្ជមានផ្នែកជលផល៕