ឯកឧត្តម លឹម គានហោ អនុញ្ញាតឱ្យលោកបណ្ឌិត Anoulak Kittikhoun ជួបសំដែងការគួរសម និងពិភាក្សាការងារ (ថ្ងៃទី០២ ខែមីនា ឆ្នាំ២០២២)

ភ្នំពេញ៖ ឯកឧត្តម លឹម គានហោ រដ្ឋមន្រ្តី​ក្រសួង​ធនធាន​ទឹក និង​ឧតុនិយម ប្រធាន​គណៈ​កម្មាធិការ​ជាតិ​ទន្លេ​មេគង្គ​កម្ពុជា និង​ជា​សមាជិក​ក្រុម​ប្រឹក្សា​គណៈកម្មការ​ទន្លេ​មេគង្គ សម្រាប់​កម្ពុជា បាន​អនុញ្ញាត​ឱ្យ​លោក​បណ្ឌិត Anoulak Kittikhoun នាយក​ប្រតិបត្តិ (Chief Executive Officer-CEO) នៃ​លេខាធិការដ្ឋាន MRC ជួប​សំដែង​ការ​គួរ​សម និង​ពិភាក្សា​ការងារ តាម​រយៈ​ប្រព័ន្ធ ZOOM។

ក្នុងកិច្ចជំនួប ឯកឧត្តមរដ្ឋមន្រ្តី បានសំដែងនូវការអបអរសាទរ និងស្វាគមន៍លោកបណ្ឌិត Anoulak Kittikhoun ដែលត្រូវបានជ្រើសតាំងជានាយកប្រតិបត្តិ នៃលេខាធិការដ្ឋាន MRC និងបានគូសបញ្ជាក់ដោយវាយតម្លៃខ្ពស់ចំពោះសមិទ្ធិផលសំខាន់ៗដែល MRC សម្រេចបានមកទល់ពេលនេះ តាមរយៈកិច្ចសហប្រតិបត្តិការតំបន់ ដើម្បីការគ្រប់គ្រង ការប្រើប្រាស់ ការអភិវឌ្ឍ និងការអភិរក្សធនធានទឹក និងធនធានពាក់ព័ន្ធប្រកបដោយចីរភាព ក្នុងអាងទន្លេមេគង្គ។

លោកបណ្ឌិត Anoulak Kittikhoun បានគោរពថ្លែងអំណរគុណយ៉ាងជ្រាលជ្រៅជូនចំពោះឯកឧត្តមរដ្ឋមន្រ្តី ដែលបានអនុញ្ញាតឱ្យរូបលោក និងសហការីបានជួបសំដែងការគួរសម និងបានជម្រាបអំពីការងារជាអាទិភាពសំខាន់ៗដែលត្រូវខិតខំបំពេញឱ្យបានប្រសើរក្នុងអាណត្តិការងាររបស់លោក និងការប្តេជ្ញាចិត្ត ដើម្បីលើកកម្ពស់កិច្ចសហប្រតិបត្តិការតំបន់ ការខិតខំប្រឹងប្រែងរួមគ្នា និងភាពជាដៃគូ ឆ្ពោះទៅសម្រេចបាននូវការអភិវឌ្ឍប្រកបដោយការទទួលខុសត្រូវ និងដោយចីរភាពក្នុងអាងទន្លេមេគង្គ។

បន្ទាប់ពីបានស្តាប់នូវការជម្រាបជូនអំពីការងារសំខាន់ៗដែលត្រូវអនុវត្តចំពោះមុខ និងការប្តេជ្ញាចិត្តរបស់លោកនាយកប្រតិបត្តិ MRCS រួចមក ឯកឧត្តមរដ្ឋមន្ត្រី និងបានសង្កត់ធ្ងន់អំពីសារសំខាន់នៃកិច្ចសហប្រតិបត្តិការតំបន់ និងបញ្ហាប្រឈមក្នុងអាងទន្លេមេគង្គ រួមមានកំណើនប្រជាជន និងការអភិវឌ្ឍ ការកើនឡើងនូវតម្រូវការទឹក ការប្រែប្រួលអាកាសធាតុ និងហានីភ័យនៃភាពរាំងស្ងួត និងទឹកជំនន់ជាដើម ដែលបាននិងកំពុងដាក់សម្ពាធមកលើធនធានធម្មជាតិក្នុងអាង ដែលត្រូវបន្តយកចិត្តទុកដាក់ពង្រឹង និងធ្វើកិច្ចសហការរួមគ្នាឱ្យបានកាន់តែប្រសើរក្នុងចំណោមប្រទេសជាសមាជិក និងជាមួយដៃគូពាក់ព័ន្ធផ្សេងទៀត ដើម្បីការគ្រប់គ្រង និងអភិវឌ្ឍន៍ធនធានទឹក និងធនធានពាក់ព័ន្ធក្នុងអាងទន្លេមេគង្គ ប្រកបដោយប្រសិទ្ធភាព និងដោយចីរភាព ដោយសម្រេចបាននូវវិបុលភាពរួមគ្នា។ ឯកឧត្តមរដ្ឋមន្រ្តី បានផ្តល់អនុសាសន៍សំខាន់ៗមួយចំនួនដែលត្រូវយកចិត្តទុកដាក់ និងបានជូនពរលោកនាយប្រតិបត្តិ ឱ្យទទួលបានជោគជ័យសម្រាប់មុខដំណែងថ្មីនេះ ដើម្បីនាំមកនូវសមិទ្ធិផលសំខាន់ៗបន្ថែមទៀតក្នុងក្របខ័ណ្ឌកិច្ចសហប្រតិបត្តិការ MRC។

លោកនាយកប្រតិបត្តិ បានគោរពថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តមរដ្ឋមន្រ្តី និងបានកត់ត្រានូវរាល់មតិយោបល់ ក៏ដូចជាអនុសាសន៍ផ្តាំផ្ញើក្នុងការលើកកម្ពស់ប្រសិទ្ធភាពនៃកិច្ចសហប្រតិបត្តិការតំបន់ និងការអនុវត្តការងារ ក្នុងគោលដៅរួមដើម្បីការអភិវឌ្ឍប្រកបដោយចីរភាព ក្នុងអាងទន្លេមេគង្គ៕